लोहारातील धक्कादायक घटना; आत्महत्येचा बनाव उघड

लोहारा (प्रतिनिधी): घरगुती वादातून आईचा खून करून त्याला आत्महत्येचा बनाव देण्याचा प्रयत्न केल्याची धक्कादायक घटना लोहारा शहरात उघडकीस आली आहे. या प्रकरणी मुलगा व सुनेविरुद्ध खुनाचा गुन्हा दाखल करण्यात आला असून, पोलिसांनी दोघांनाही अटक केली आहे.

महेश सुरेश रणशुर (वय ३५, रा. लोहारा, ह.मु. शिवहरी ग्रीन सिटी, वापी, जि. वलसाड, गुजरात) यांनी लोहारा पोलिस ठाण्यात फिर्याद दिली. त्यांच्या फिर्यादीत नमूद केल्याप्रमाणे, त्यांचे भाऊ सौदागर रणशुर व पत्नी पूजा रणशुर हे नेहमीच आई उमाबाई रणशुर (वय ५५) यांच्याशी वाद घालत असत. याआधी देखील त्यांनी आईला मारहाण केली होती.

सोमवारी (२५ ऑगस्ट) दुपारी १२ ते १ वाजण्याच्या दरम्यान सौदागर व पूजा रणशुर यांनी आई उमाबाई यांना शिवीगाळ करून लाथाबुक्क्यांनी बेदम मारहाण केली. या मारहाणीमुळे उमाबाई यांचा मृत्यू झाला, असे फिर्यादीत म्हटले आहे. दरम्यान, आरोपींनी या घटनेनंतर आईने गळफास घेऊन आत्महत्या केल्याचा बनाव रचला होता. मात्र त्याच दिवशी दुपारी सौदागर रणशुर याने पाठवलेला एक व्हिडीओ फिर्यादीच्या मोबाईलवर आला. या व्हिडीओत सौदागर व पूजा रणशुर हे आईला शिवीगाळ करून मारहाण करत असल्याचे स्पष्ट दिसून आले.

सायंकाळी सव्वासहाच्या सुमारास पोलिस घटनास्थळी दाखल झाले. मृतदेह लोहारा ग्रामीण रुग्णालयात शवविच्छेदनासाठी पाठविण्यात आला. प्राथमिक तपासात खुनाचे सत्य समोर आल्यानंतर पोलिसांनी सौदागर रणशुर व पूजा रणशुर या दोघांविरुद्ध खुनाचा गुन्हा दाखल करून अटक केली आहे. या प्रकरणाचा पुढील तपास सहाय्यक पोलीस निरीक्षक ज्ञानेश्वर कुकलारे करीत आहेत. या घटनेने धाराशिव जिल्हा हादरून गेला आहे.