‘कलंकित’ मंत्र्यांविरोधात ठाकरे गटाचे अनोखे आंदोलन!

धाराशिव (प्रतिनिधी): महायुती सरकारमधील काही मंत्र्यांना ‘कलंकित’ आणि मुख्यमंत्र्यांना ‘हतबल’ संबोधत शिवसेना (उद्धव बाळासाहेब ठाकरे) गटाने जिल्हाधिकारी कार्यालयासमोर सोमवारी दुपारी एक हटके आंदोलन केले.

या आंदोलनात आमदार कैलास पाटील, आमदार प्रवीण स्वामी, माजी आमदार दयानंद गायकवाड, जिल्हाप्रमुख रणजित पाटील यांच्यासह पक्षाचे पदाधिकारी व शिवसैनिक मोठ्या संख्येने उपस्थित होते. मंत्र्यांच्या कथित भ्रष्टाचार व बेजबाबदार कारभारावर प्रतीकात्मक टीका करण्यासाठी कार्यकर्त्यांनी रमी पत्ते खेळणे, अघोरी पूजा करणे, तसेच पैसे व ‘ड्रग्ज’चे प्रतिकात्मक वाटप अशा विलक्षण पद्धती वापरल्या.

क्रीडामंत्री माणिकराव कोकाटे यांच्यावर निशाणा साधण्यासाठी आंदोलनस्थळी पत्याचा डाव सुरू केला. महसूलमंत्री चंद्रशेखर बावनकुळे यांच्या विरोधात ‘ड्रग्ज’ लिहिलेल्या पुड्या फेकण्यात आल्या. तर मंत्री भरत गोगावले यांना ‘जादूटोणा करणारे मंत्री’ असे संबोधून त्यांच्या नावाने अघोरी पूजा मांडण्यात आली.

आंदोलनादरम्यान “कलंकित मंत्री, हतबल मुख्यमंत्री” अशा घोषणांनी परिसर दणाणून गेला. शिवसेना (उद्धव बाळासाहेब ठाकरे) गटाच्या या अनोख्या आंदोलनाने परिसरातील नागरिकांचे विशेष लक्ष वेधून घेतले.