महायुती आणि महाविकास आघाडीत जागावाटपाचा गोंधळ; तिन्ही पक्षांच्या स्पर्धेमुळे कार्यकर्त्यांमध्ये नाराजी

महायुती आणि महाविकास आघाडी दोन्हीकडे कार्यकर्ते अस्वस्थ

कळंब (प्रतिनिधी) : महायुती आणि महाविकास आघाडीत तिन्ही-तिन्ही पक्ष एकत्र आल्याने स्थानिक स्वराज्य संस्था निवडणुकांच्या पार्श्वभूमीवर तळागाळातील कार्यकर्त्यांत मोठी नाराजी उसळली आहे. दोन्ही आघाड्यांमध्ये जागावाटप, उमेदवार निवड आणि स्थानिक पातळीवरील नेतृत्वाबाबत तीव्र तणाव निर्माण झाल्याचे चित्र राज्यभरात दिसत आहे.

राज्यातील महायुतीमध्ये भाजप, शिवसेना शिंदे गट आणि राष्ट्रवादी अजित पवार गट हे तीन पक्ष एकत्र आहेत. या तिघांच्या आघाडीत प्रत्येक जागेवर तीन-तीन दावेदार असल्याने परिस्थिती अधिक गुंतागुंतीची झाली आहे. भाजपचे पारंपरिक कार्यकर्ते आपली संघटनात्मक ताकद आणि गेली अनेक वर्षे केलेलं संघटनात्मक काम दाखवत जागांवर दावा करत आहेत. दुसरीकडे शिंदे गटाचा दावा आहे की अनेक मतदारसंघांमध्ये शिवसेनेची पूर्वीपासून मजबूत पकड असल्याने तिथे संधी आम्हालाच मिळावी. तिसरीकडे अजित पवार गटाचे स्थानिक नेते स्वतःचा वाढता प्रभाव आणि संघटनशक्ती दाखवत तितक्याच जोरात दावा करीत आहेत.

याचा परिणाम असा झाला आहे की एका जागेसाठी तीन पक्षांचे तीन वेगवेगळे नेतृत्व, वेगवेगळे गट आणि वेगवेगळे कार्यकर्ते इच्छुक असल्याने महायुतीत तळागाळात प्रचंड तणाव आहे. काही ठिकाणी भाजपचे कार्यकर्ते नाराज तर काही ठिकाणी शिंदे गट किंवा अजित पवार गटाचे कार्यकर्ते अस्वस्थ असल्याचे दिसते. “आम्ही दिवसरात्र काम करतो; पण जागा वरच्या पातळीवर ठरतात आणि आमच्या मेहनतीचा विचार केला जात नाही,” असा सूर अनेक कार्यकर्त्यांतून ऐकायला मिळतो.

अशाच प्रकारची परिस्थिती महाविकास आघाडीतही आहे. या आघाडीत काँग्रेस, शिवसेना उद्धव ठाकरे गट आणि राष्ट्रवादी शरद पवार गट या तिन्ही पक्षांचा समावेश आहे. काँग्रेसचे स्थानिक नेते अनेक जागांवर परंपरागत प्रभाव असल्याचा दावा करतात. शिवसेना उद्धव ठाकरे गटाला आपली गळती थांबवून पुन्हा ताकद निर्माण करायची असल्याने ते अनेक मतदारसंघांत अधिक जागा मागत आहेत. राष्ट्रवादी शरद पवार गटाचाही अनेक ठिकाणी प्रभाव असल्याने तेही कमी जागांवर समाधानी नसल्याचे स्पष्ट दिसते.

महाविकास आघाडीतील या त्रिकोणी समीकरणामुळे तळागाळातील कार्यकर्त्यांत गोंधळ, असंतोष आणि तणाव निर्माण झाला आहे. अनेक ठिकाणी काँग्रेस आणि उद्धव गटाच्या कार्यकर्त्यांमध्ये मतभेद, तर काही ठिकाणी राष्ट्रवादीच्या दोन गटांमधील स्पर्धेचा अप्रत्यक्ष परिणामही जाणवत आहे. या सर्व घडामोडींमुळे महाविकास आघाडीत जागावाटपाचा प्रश्न अधिक कठीण बनला आहे.

स्थानिक स्वराज्य संस्थांच्या निवडणुका स्थानिक नेतृत्व, स्थानिक गटबाजी आणि कार्यकर्त्यांच्या मेहनतीवर आधारित असतात. त्यामुळे तिन्ही तिन्ही पक्षांची आघाडी असताना जागा मर्यादित आणि इच्छुक जास्त असल्याने गोंधळ वाढत आहे. तळागाळातील कार्यकर्त्यांचा सूर एकच आहे – “आम्हाला संधी मिळत नाही.” अनेक कार्यकर्ते नाराज असून काही ठिकाणी बंडखोरीची शक्यता वाढताना दिसते.

राजकीय विश्लेषकांचे मत असे की महायुती आणि महाविकास आघाडी या दोन्ही आघाड्यांना अंतर्गत नाराजीचे व्यवस्थापन करणे हा मोठा प्रश्न बनला आहे. कार्यकर्ते नाराज असल्यास प्रचारात जोम कमी होतो, संघटनात्मक कामकाज शिथिल होते आणि निकालांवर त्याचा थेट परिणाम होऊ शकतो. काही ठिकाणी नाराज कार्यकर्ते अपक्ष म्हणून उभे राहण्याची शक्यता व्यक्त केली जात आहे, तर काही ठिकाणी संपर्क, प्रचार आणि बूथ व्यवस्थापनावर त्याचा परिणाम होऊ शकतो.

या परिस्थितीची जाणीव दोन्ही आघाड्यांच्या वरिष्ठ नेतृत्वाला असून जिल्हानिहाय बैठक, समन्वय चर्चा व कार्यकर्त्यांशी संवाद या माध्यमातून नाराजी कमी करण्याचे प्रयत्न सुरू आहेत. जागावाटपाबाबत काही प्रमाणात तडजोडीची भूमिका घेण्याची तयारीही दोन्हीकडे दिसत आहे. मात्र प्रत्यक्ष तिकिट वाटप सुरू होईपर्यंत नाराजी पूर्णपणे निवळेल असे दिसत नाही.

आगामी काही दिवसांत महायुती आणि महाविकास आघाडीत जागावाटपावरून मोठे राजकीय चित्र स्पष्ट होणार आहे. परंतु कार्यकर्त्यांच्या वाढत्या नाराजीचा परिणाम या निवडणुकांच्या गणितात मोठा बदल घडवू शकतो, असे संकेत सध्या मिळत आहेत.